من اول السطر

و كأننا بنبدأ من جديد و احنا داخلين على 25 يناير تاني 

في نفس التوقيت تقريبا من سنة بدأت نفس الاحداث و انتهت بالثورة يوم 25 ناير 2011 

مش مهم ان الثورة طولت شوية عندنا لاننا مش بنحب التسرع في بناء مصر 

المهم اننا هانفضل على نفس النهج لغاية اما نخلص مصر من كل عدو داخلي قبل الخارجي 

لان العدو الداخلي بيأذي اكتر و اشد لانه مننا مش غريب 

مش هاتكلم عن علاء سيف كتير لان تاريخه في النضال ضد الظلم و النظام اكبر من اني اتكلم عليه 

و يكفي انه اول واحد يرفض الخضوع للتحقيق او حتى المسائلة من النيابة العسكرية اللي مالهاش حق حتى تقول لنا من انتم 

من بعده طبعا ظهرت حركات و ائتلافات بتقول نفس الكلام مع ان المفروض ان ده كان يحصل من بدري 

لكن هم فضلوا انهم يشربوا شاي بالياسمين مع المجلس على انهم يقولوا رأيهم بصراحة 

و اما علاء قالها بصوت عالي لا للمحاكمات العسكرية للمدنيين 

انطلقت بقى حركة كذا و شباب كذا يردده نفس موقفه 

ما كان من بدري 

يالا مش مشكلة 

علاء اخد 15 يوم حبس على ذمة التحقيق لانه رفض التحقيق اصلا 

و ادعى اللي اسمه احمد زبايضر ان هو اللي حبسه 

يمكن على اساس ان زبايضر هو الابن البار للمجلس و اعضائه و عنده اخبار من قبل صدرو قرار الحبس 

المضحك في الامر بقى ان المرحوم مينا داينال هو اول اسم على قائمة المتهمين بالتحريض في احداث ماسبيرو 

محضر التحريات اتكتب يوم 17 اكتوبر بحسب كلام الاستاذ احمد سيف اللي شاف المحضر 

و مكتوب كمان جنب اسم مينا انه متوفي 

الله ... طيب و لما هو متوفي مطلوب للاستدعاء ليه 

المهم يعني اننا رجعنا لنفس الاحداث و باقي تقريبا جريمتين كبار و لا حاجه 

زي مثلا استشعار المحكمة الحرج و احتمالية اسقاط التهم 

بس قبل ما ده يحصل و قبل ما مجلس العسكر يكمل في الحكم و لا حتى يرجع النظام اللي هو اصلا ماسقطش

بدأنا من جديد و لاننا بنحب مصر هانكمل و مستمرين لاخر نفس فينا 

الموت شهداء او تحرير مصر من حكم العسكر و نظام مبارك 

لا خوف و لا شفقة

طبعا لا خوف و لا شفقة ... اللي قتلوا عصام هايخافوا من ايه اذا كان العيسوي بيحميهم و بيحمي اي قاتل منهم و بينكر اي تهمة موجهه لاي فرد امن من بتوع الداخلية 

و هايكون عندهم شفقة ليه اذا كانوا اتعودوا على العنف و القتل و عارفين ان الحكومة هاتحميهم 

عارفين و متأكدين انهم كل اما يموتوا حد من الشعب سواء بالتعذيب او بإطلاق النار مباشرة عليه الحكومة هاتنكر اصلا ان في اسلحة و لا في تعذيب ... الشعب بيتبلى على الحكومة 

والدة عصام ست مصرية طيبة ابنها اتقبض عليه لانه كان واقف بيتفرج على خناقة في المقطم جت الشرطة العسكرية قبضت على كل اللي واقفين و هو منهم و اتحكم عليه عسكريا بسنتين 

قدر يدخل شريحة موبايل للسجن زيه زي كل المساجين و خاصة طبعا بهوات النظام اللي موجودين صوريا بس في طرة انما عايشين في قصورهم جوا بكل سبل الرفاهية منهم موبايلات و لابتوبات 

المهم كان مديون لواحد جوا السجن الواحد ده من المخبرين بتوع الداخلية من المساجين واحد باع نفسه للي يدفع و راح بلغ عن عصام 

 انه معاه مخدرات 

جه ضابط اسمه نور و ده بحسب رواية عصام لاهله قبل الوفاة بيوم و مسكوا قعد يعذب فيه عشان يعرف المخدرات فين 

التعذيب كان لمدة يومين بإدخال خرطوم مية من فتحة الفم و فتحة الشرج و كانوا بيشربوه مياة بمسحوق غسيل عشان يرجع اللي شربه من خراطيم المياة 

اليوم التاني للتعذيب رجع تعبان و قعد يرجع دم و استشهد في ساعتها راح اخدوه على المستشفى و عملوا محضر انه تعاطى برشام

الدكتور اللي كانت موجود قالت انه وصل المستشفى و كل اجهزته معطلة ة انه مش ميت ببرشام و انه ده تسمم

المستشفى بلغت النيابة و نقلوه على مشرحة زينهم عشان النيابة تروح تحقق 

و في انتظار تقرير الوفاة النهائي 

طبعا مش هايحصل حاجه حتى لو التقرير ادان ضباط التعذيب و هاتبقى قضية و ياخدوا 7 سنين زي اللي قتلوا خالد سعيد 

و بس على كده عشان احنا بنقعد نحسبن و نقول منكم لله و نعمل مسيرات من مبنى لمبنى بس 

لا ثورة و لا يحزنون 

عليه العوض و منه العوض 

امسك فلول

ده شعار الحملة الهادفة و ان شاء الله نقدر نساعد يمكن نقدر نغير حاجه قبل فوات الاوان 

البعض بيقول ان مافيش اودامنا غير التصويت للفلول اللي قدروا بمساعدة كل اللي رفض اصدار قانون العزل السياسي زي الحكومة الفاشلة و المجلس العسكري انهم يسجلوا نفسهم كمرشحين في الانتخابات القادمة

او نصوت للاخوان 

مش عارفه اذا كان هناك مخرج ثالث آمن و لا لأ بس بقول يارب افرجها من عندك 

اصل مش معقول تكون الفئتين دول هم اللي هايكتبوا دستور البلاد ان شاء الله 

يعني الفلول اللي الثورة قامت عشان يمشوا تقوم الانتخابات تجيبهم اعضاء شعب و شورى و كمان يشكلوا لجنة الدستور 

يبقى عملنا ايه .... و لا حاجه طبعا 

المهم يعني 

ربنا يستر 

كانوا أنفسهم يظلمون

الديكتاتور يصنع نهايته بنفسه ... ماعتقدش اننا قرأنا او شوفنا اي ديكتاتور في العالم الا و كانت نهايته نتيجة لاعماله ( و من اعمالكم سلط عليكم )

المفروض الآية الكريمة دي تكون اودامنا دايما ... عملنا خير هانلاقي خير ... عملنا شر هانلاقي شر

بس بقى الطغاة عمرهم مابيشوفوا الا نفسهم و مش بيعملوا اي حاجه في الدنيا الا لو كان فيها مصلحة شخصية لهم

و بيكونوا عارفين كويس انهم بيرتكبوا جرائم مافيش حد فيهم مجنون

اخر شخص شوفنا مصيره و نتيجة اعماله كان العقيد معمر القذافي ... ماحدش فينا يقدر يحكم على رئيس دولة تانية و لا نقدر نحدد مدى معاناة شعب تاني الا عن طريق الاخبار اللي بنقراها او بنسمعها

بمعنى اننا لا عشنا المعاناة و لا حتى نعرف الرئيس ده الا بظهوره الاعلامي او وجود اخبار و بس على كده

معاناة الشعب الليبي عرفناها اما بدأت اخبار مايحدث هناك تظهر في الاعلام

لان في من اهالينا بيسافروا ليبيا بحثا عن الرزق و في اللي بيسافر سوريا و اليمن و تونس للعمل او السياحة... و كان في برضه اللي بيجوا مصر

رغم كل الاوضاع اللي ظهرت على السطح في الفترة الاخيرة في الدول دي كان في سفر و ناس رايحة جاية و ماحدش من اللي زاروا الدول قال لازم تحصل ثورة في اليمن و لا سوريا و لا ليبيا و لا تونس و لا مصر و لا البحرين

لان الزائر او العامل في بلد مش هايقدر يحدد مدى المعاناة بشكل صحيح ... اللي يقدر هو شعب البلد و بس

المهم يعني ... سقط القذافي ... له ما له و عليه ما عليه

سمعنا و شوفنا الاخبار عن اللي حصل في مدن ليبية بعد اندلاع ثورة 17 فبراير و كانت النهاية اللي شوفناها يوم الخميس نتيجة حتمية لكل اللي شوفناه عن طريق وسائل الاعلام المختلفة

بس الفيديوهات اللي تناقلاتها وسائل الاعلام مؤخرا عن القبض على القذافي و ابنه معتصم و قتلهم بعد اسرهم ... ادى الى ان الامم المتحدة قد تطالب بفتح تحقيق بخصوص مقتلهم على ايدي الثوار و ذكرت الامم المتحدة انه اذا صحت المعلومات عن قتلهم بعد القبض عليهم فده يعتبر جريمة حرب

ضد الجرائم اللي ارتكبها القذافي و نظامه من قتل و حرق و اغتصاب للابرياء لكني برضه ضد الطريقة اللي تم بها التعامل معه بعد القبض عليه

لكن انا ماقدرش احكم على مدى صحة طريقة التعامل مع القذافي و ابنه بعد القبض عليهم احياء او خطأها لاني لم اعاني زي ما عانى اهل ليبيا

و تبقى هي دي نهاية اي ديكتاتور سواء كان رئيس دولة او رئيس قبيلة او رئيس عصابة او رئيس في العمل

بسم الله الرحمن الرحيم

 (( فَكُلا أَخَذْنا بذنبه فمنهم من أرسلنا عليه حاصبا و منهم من اخذته الصيحة و منهم من خسفنا به الارض و منهم من أغرقنا و ما كان الله ليظلمهم و لكن كانوا أنفسهم يظلمون )) صدق الله العظيم 

و يبقى الحال

انتظرنا جميعا ظهور الاستاذ يسري فودة و الكاتب علاء الاسواني و ابراهيم عيسى ليلة الخميس في برنامج اخر كلام على قناة اون تي في قيل ان الحوار سيكون للرد على ما قاله عضوي المجلس العسكري اللواء العصار و اللواء حجازي في برنامج العاشرة مساء مع منى الشاذلي و ابراهيم عيسى 

لكن تفاجىء كل سكان تويتر برسالة من يسري فودة على حسابه الشخصي بتفيد انه مش هايظهر ليلتها في اخر كلام و هايصدر بيان في اليوم التالي 

و فعلا يوم الجمعة صدر بيان على صفحة يسري فودة على الفيس بوك اعلن فيه تعليقه لبرنامج اخر كلام حتى اشعار اخر ذاكرا اسباب من نوعية اللبيب بالاشارة يفهم 

و اشار الى وجود ضغوط على كل من يرغب في عدم كتم الحقائق او السكوت عنها

و فهمنا طبعا المقصود بكلامه ... طيب و بعدين هانعمل ايه 

يعني برنامج اخر كلام توقف مؤقتا و نجح العسكر في اسكات صوت من اصوات الحق على الاقل كان بيقول كلام صحيح 

مين بقى اللي هايرد على كلام لواءات المجلس العسكري اللي كان مستفز في احيان كثيرة جدا في حوارهم في العاشرة مساءا

طيب يسقط يسقط حكم العسكر 

احزاب فلول الحزب الوطني

نشرت جريدة الدستور قائمة بالاحزاب اللي اسسها اعضاء سابقين في الحزب الوطني المنحل او كانت لهم اي علاقة بالنظام البائد

طبعا ظهور الاحزاب دي و مؤسسيها و اعضائها بيوضح جدا ان لا في قانون غدر و لا عزل سياسي هايتطبق 

ماننساش ان مسيو عمرو موسى بسيجاره الشهير قال ان مايصحش تطبيق قانون العزل السياسي على بقايا اعضاء النظام

طبعا هو مش واحد منهم لازم يدافع و ده يدل ان لو لا قدر الله تم انتخابه كرئيس يبقى الفلول عائدون بقوة 

الحكومة مش عايزه

الشعب يريد العزل السياسي و الحكومة مش عايزه 

 تخيلوا ان نسبة كبيرة جدا من اللي سجلوا نفسهم كمشرحين من يوم الاربعاء اللي فاتت هي من اعضاء الحزن الوطني المنحل

و ده لان تفعيل قانون العزل السياسي ماحصلش و الحكومة تقريبا خافت من تهديد الفلول في الصعيد 

دلوقتي ماحصلش عزل سياسي و هانلاقي انتخابات نزيهة اياها بتاعت العصر البائد 

مثلا حسام كامل حبيب الحزن الوطني فاز في انتخابات جامعة القاهرة و ده لان الاساتذة صوتوا له و المعيدين لأ 

اذا في ناس متعلمة اهو و اساتذة كبار تابعين للحزن الوطني المنحل لسه و هاينتخبوا اي حد كان تبعه برضه 

دلوقتي ممكن مايحصلش تزوير في الانتخابات و لكن هايحصل بيع للاصوات عادي جدا 

اللي كان بياخد 50 حنيه هايخدها تاني و ممكن المرة دي يوزعوا اي سلعة من السلع الاساسية اللي تمنها غالي في الاسواق

ده كله هايحصل لان قانون العزل السياسي معزول عن التفعيل 

الاساليب القديمة هايكملوها و عادي هايفوزوا في الانتخابات الجاية 

انا رأي بقى اننا نمتنع عن التصويت و نعلن ده في مؤتمر كبير ان طول ما الفلول موجودين على القوائم ... الشعب مش هايشارك

أعداء الوطن

هو الجيش بيتعامل ليه مع الشعب على ان الشعب هو اعداء الوطن 

يعني في الاول كان يعمل المصيبة و يقول رصيدنا لديكم يسمح 

يعني عارف انه غلط و بيطلب اننا نغفر له خطائه 

دلوقتي بيدعي ان ماطنش في رصاص حي و لا حد ضرب اصلا

المتظاهرين هم اللي ماتوا لوحدهم من الغيظ بقى من الجو الحر و الزحمة بتاعت المسيرة 

الجيش و الوزارة القمر فتحوا تحقيقات مع اللي قبضوا عليهم يوم المجزرة و اتحول الامر للنيابة العسكرية اللي صممت انها الجهة المختصة الوحيدة 

طيب هل قبضوا على اي حد من اللي اطلق نار على المتظاهرين و لا هو مافيش غير متظاهرين بس في التحقيقات 

اصلا مافيش اي فرد جيش و لا شرطة اتوجه له اي اتهام و لا اي تحقيق معاه طبعا 

الجيش بيتعامل معانا بندية و عدائية مالهاش تفسير ... يعني دول شعب بلدك اللي انت جيشها بتموتهم ليه 

يعني لو في حد غلط مثلا زي ما الجيش بيدعي و ضرب نار على الجيش يومها هل يتم الرد عليه بقتل كل اللي ماتوا دول

و اللي يضحك بقى ان في ناس مصدقة ان كان في قناصة مستخبيين في فندق هليتون و في بلطجية مدسوسين بين المتظاهرين 

و الاتنين ولعوا الدنيا بين الجيش و الشعب ... طيب يا سادة يا كرام المدرعات اللي كانت بتتحرك وسط الناس دي تبع البلطجية و لا القناصة

اللي شايف نفسه جامد اوي كده و بيموت اهله و ناسه ياريت يروح يسترجل على الحدود و يجيب حق الجنود اللي اتقتلوا مش يكتفي بــ " ناسف لما حدث لكم " بتاعت ايهود باراك

فوتوشوب الثورة

اللواء إسماعيل عتمان: الجيش لم يطلق النار على متظاهري ماسبيرو.. والجنود لم يكونوا مسلحين بذخيرة حية

لا لا معلش ... اه

 الجيش لا ضرب نار و لا كان عنده ذخيرة حية من اصله 

احنا اما بنقول اننا واقفين في شوارع مصر بنحميكم ده كلام و بس عشان تحسوا بالتوهان و الاستكراد اللي انتوا وافقتوا عليه قبل كده


انما نحميكم بذخيرة حية ده كلام ... نقتلكم اه ... ندوس عليكم بمدرعات اتسرقت مننا اه 

و بمناسبة المدرعات بقى يظهر انكم نسيتوا الفيديو ده 

الفيديو ده برعاية مركز لندن لسرقة الدبابات و المدرعات

********************************************* 

لا الجيش اطلق النار و لا عندهم ذخيرة حية و مدرعاتهم اتسرقت بحسب كلام اللواء فلان الفلاني مع وائل الابراشي عن سرقة المدرعات 

زي سرقة العربيات الدبلوماسية اللي دهست الثوار برضه قبل كده 

ده ايه البلد اللي العربيات و المدرعات بتتسرق فيها عشان يدهسوا الناس بها دي

طبعا الصور اللي جاية دي فوتوشوب بقى على كده لا في ناس استشهدت و لا حاجه 

حق الشهداء دول و غيرهم مش هايضيع و ذنبهم في رقبة كل واحد ساعد في قتلهم سواء بقى كان متوتر و لا سرق مدرعة و لا ماكنش معاه ذخيرة حية 

و من التوتر ما قتل

جلس المذيع المتوتر يحكي للمواطنون الشرفاء على اللي بيحصل في ماسبيرو

و لقد تفضلت المذيعة اللي ماتعرفش حاجه لانها ماشافتش حاجه و ماسمعتش و ماعندهاش معلومات (مذيعة ازاي ياربي دي) بالحديث عن ازاي العساكر العزل الابرياء اللي بيحموا ماسبيرو تم الاعتداء عليهم من قبل " فئة" (الله اعلم مين الفئة دول بحسب كلامها )

 و طبعا كل الكلام اللي قالته ده لا تعرفه و لا شافته و لا عندها اي معلومة عنه نهائي غير من وكالة الانباء اللي بتنقل لها ان في مبنى ماسبيرو الخطير تحت في مصابين ملفوفين في ملايات ( سكر وكالة الانباء دي)

الاتنين المتوترين دول انكروا انهم له اي علاقة بأي من الاحداث المؤسفة اللي حصلت و اللي راح ضحيتها 24 شهيد مصري

و روحوا بيوتهم و ناموا في سرايرهم عادي جدا بعد ما تسببوا هم و اعلام القبح و التدليس و الكذب في قتل 24 مصري و اصابة فوق الـ200 اخرين

بس على فكرة يا سيادة الوزير الخطير مش بس مذيعينك المتوترين لا ده شريط اخبارك و معد برامجك كمان ... شوفت الصورة دي ... 

ايه رأيك بقى و لا هو كلام المذيع المتوتر بيتكتب اوتوماتيك على الشاشة

سيادتك لسه موجود في الوزارة لغاية دلوقتي ليه ... هو مافيش توتر خالص كده يعني ...

خلي عندي شوية توتر بقى و امشي 

مين اللي امر بإستخدام العنف مع المتظاهرين امبارح

بعد الاحداث المؤسفة اللي حصلت امبارح في مصر و اللي كان ضحيتها ابرياء كتير من الطرفين مش هاقول جيش و شعب عشان المفروض الجيش من الشعب و الشعب بيحمي بلده زيه الجيش بالظبط

اللي حصل ماينفعش السكوت عليه و لا انه يعدي كده بمجرد صدور قرارت هزيلة من حكومة تعتبر من المساوىء اللي حطت على الثورة

لاننا عارفين ان لا حد هاينفذ قرارات و لا القرارات هاتفيد في اي حاجه ... هي من امتى الحكومة الحالية عملت شيء مفيد

بالعكس قمة التخبط و الانفلات بسبب الحكومة المتخازلة و خوفها و رعبها على كراسيها و مرتباتها الكبيرة

كل عضو في الحكومة الضعيفة دي مسئول عن كل شخص استشهد امبارح من اول الاستاذ شرف لغاية اقل وزير

احترمتك اول يوم يا دكتور شرف بس متهيالي انت عارف كويس اوي انك تخازلت و تواريت مش بنشوف اخبارك غير اما بتروح لدول العالم تستلف منهم فلوس بحجة مصر و اقتصادها المنهار

مش تقعد تشوف ايه سبب الانهيار اللي هو انت اساس فيه لا تختار اسهل الحلول و مش مهم ما انت ماشي خلاص و خلي البلد مديونة

ما علينا من الكلام ده دلوقتي

لو ماوقفناش كمصريين كلنا مع بعض بغض النظر عن الديانة ضد اي فاسد او طامع في السلطة و بيشعل الفتنة و في نفس الوقت بيقول ماتستمعوش للفتن و هو سايب اصحاب الالسنة السليطة توقع بين الناس .... البلد فعلا هاتضيع مننا

الهدف او الاهداف من اللي حصل و هايحصل كتيرة ... استمرار حكم العسكر بحجة الانفلات الامني و الفتنة الطائفية اللي انطلقت على لسان شرف امبارح ... استمرار المحاكم العسكرية اللي سبحان الله يتم الغائها و بعد اقل من ساعة يقبضوا على ناس و هايتقدموا للمحاكم العسكرية

سؤال بقى ... مين اللي امر بإطلاق النار على المتظاهرين امبارح ... مش اللي امروا قبل كده موجودين في السجن دلوقتي و بيتحاكموا

مين اللي امر امبارح بإطلاق النار على المتظاهرين ... و لا هي الاوامر صادرة من بدري من اول يوم 28 يناير كده لغاية الله اعلم امتى ان يتم قتل اي متظاهر مهما كانت مطالبه و مش بس كده لا و اتهامه كمان بأنه اعتدى على الجيش و الامن يعني تموتوه و تتهموه باطل

ده ايه الجبروت ده ... انتم ايه

ربنا نجا فرعون ببدنه عشان اللي زيكم يتعظوا ... مافيش اي عظة و لا عبرة و مكملين على درب فرعون بمنتهى التحدي لكل الاعراف و الاديان و الاوامر الالهية

ربنا ينجي مصر منكم و من شروركم و غصب عنكم الشعب هايكون ايد واحدة ضد اي فاسد منكم