قصاقيص

 الاصرار على بقاء اسامه هيكل كوزير للاعلام امر غير مفهوم و مافيش مبرر له و لا هانعرف ايه السبب اصلا ..الا اذا كانوا عايزين يعملوا تمثيلية سخيفة كده في جلسة من بتوع البرلمان و قال يعني بقى الاعضاء اصحاب الاغلبية يقدموا استجواب و يتشال فيها هيكل و كأن البرلمان بقى بيأمر العسكر اهو و العسكر بيسمع الكلام

على الرغم من تصريحات شاهين عضو مجلس العسكر الا ان الجميع اصر على خوض الانتخابات و هم عارفين انه برلمان كارتوني لا صلاحيات له لا دستور و لا تشكيل حكومة و لا حتى اوامر للعسكر... الله اعلم بالنوايا بقى

كل الانتهاكات اللي حصلت في المرحلة الاولى للانتخابات رغم انها جنح يعاقب عليها القانون الا ان اللجنة العليا للانتخابات قالت انها لم تؤثر على سير العملية الانتخابية ..يعني جرائم تعتبر جنح نقول عليها لم تؤثر و مش مهم ان في رشاوي و دعاية بره و جوا اللجنة و مش مهم ان في تلقين بالتصويت لجهة معينة و مش مهم الدعاية على اساس التطرف الديني ... المهم ان الانتخابات مشيت صح و خلاص و انها احسن انتخابات من ايام الفراعنة ...على اساس ان توابيت الاقتراع ايام الفراعنة كانت وحشة و اتحسنت بعد 7 الاف سنة ..انتخابات مسلوقة بيتغاضوا فيها عن جرائم لمجرد الادعاء انها انتخابات حلوة و امورة و حضارية تحت حكم العسكر الطاهر الشريف

الجنزوري و وزارته مش اكتر من عنصر من عناصر التشتيت اللي بيعملها العسكر دايما ..اتمنى مانهتمش بها غير بس للتريقه عليه و على وزراته و الترفيه عن نفسنا ..لاننا مش بنعترف بشرعية العسكر اصلا يبقى ليه نهتم بحكومة هو معينها ..خليها زيها زي الانتخابات و برلمان العسكر كده

باقي كام يوم على ذكرى تفجير كنيسة القديسيين و ماحصلش اي حاجه بالعكس ده العادلي العقل المدبر للتفجير و قاتل سيد بلال ... عينه دخل فيها شوية هوا راح اتعالج على حسابنا و اتعمل له عملية و المصابين اللي عيونهم راحت بعضهم حاله بسيط مش قادر على تمن العلاج و العملية وبتالي معرضين لفقدان البصر للابد

العسكر و شرف عملوا حاجه اسمها صندوق مصابي الثورة بعد احداث 18 نوفمبر اللي العسكر و الداخلية بتاعته ضربوا فيها المعتصمين اللي مازادوش عن 200 من مصابي الثورة و قال ان الدولة هاتدي تعويض لاسر الشهداء و المصابين ...بعد كده الاقي على شريط الاخبار بتاع قناة النيل للاخبار خبر بيقول للتبرع لصندوق مصابي و شهداء الثورة حساب رقم كذا ...يعني انتم تقتلوا الشعب و تلموا فلوس منه عشان تدوا له تعويض

كل مرشحي الرئاسة بلا اي استثناء لا يستحقوا الاحترام سواء اللي عايز يبقى رئيس حكومة انقاذ بتكليف من العسكر اللي هو في نفس ذات الوقت بيقول عليه مالوش شرعية ... او اللي رايحين يشكلوا مجلس استشاري خاص و تابع للعسكر و معجبين اوي بكلمة تابع لان ده اللي اتعودوا عليه مايكونوش اكتر من تابع لاوامر اسيادهم ...او التاني اللي كل 15 يوم يدي العسكر 24 ساعة للرد عليه .. و يمر اسبوعين و ماحدش يسأل فيه يجي تاني يديهم نفس المهلة ... تقريبا يقصد 24 شهر او 24 سنة انما اشك انها 24 ساعة دي خالص