على اصلكو بانو

خرج المارد من القمقم خلاص ... المقصود بالمارد هنا هو الشعب الذي ثار فقتل و اعتقل و فقأت عيونه و عندما حلم بإنشاء برلمان مصر الثورة سرق منه الحلم من قبل مارد اخر .. كان مسجون لاكثر من 80 عام ..انتظر الاخوان بوادر نجاح الثورة و استغلوا نزول شباب الاخوان يوم 25 يناير للادعاء بأن الاخوان كانوا في الميدان منذ ذلك التاريخ مع انهم انكروا ذلك حينما اتهمهم حبيب العادلي و لكن ما علينا ... اللي استغل الثورة و الشهداء استغل خلاص و وزع مواد تموينية و دخل البرلمان و خلصت على كده

الاخوان خلقوا بالونة و هالة اعلامية ان سبب المعارضة لهم هو التخوف من سيطرة المد الاسلامي في التشريع و الحياة الاجتماعية في مصر و كأن المعارضين ماسكين ازايز الخمرة ليل نهار و قاعدين على ترابيزات القمار و ماشيين عريانين في الشارع و غاويين يتفرجوا على افلام اباحية و يقروا روايات الكفار و بالتالي فهم معارضين التواجد الاسلامي المتمثل في الاخوان و السلفيين

بالنسبة لي انا مابحبش المتسلقين اللي يبيعوا افكارهم و مبادئهم و يغيروا لونهم عشان مصلحتهم ايا كانوا اخوان سلفيين ليبراليين مفكرين شعراء ادباء مش مهم المسمى .. المهم ان بتاع مصلحته اعارضه و لا له عندي اي احترام و لا كأنه موجود اصلا

لغاية اللحظة دي لم يخرج اي تصريح من الاخوان او السلفيين و لا الكتلة المصرية بأحزابها بخصوص احداث التحرير المؤسفة اللي ابتدت صباح يوم 19 نوفمبر و كل اللي حصل في شارع عيون الحرية (محمد محمود سابقا) اقصد هنا تصريح ادانة صريحة للداخلية و المجلس العسكري

شباب الاخوان و بعض شباب السلفيين و الليبراليين كانوا بالفعل متواجدين مع معتصمي التحرير و لهم احترامي المهم يناقشوا قيادتهم في ان الخاين شخص مكروه و ان شاء الله هايتكشف على حقيقته لانه بطبيعته متلون حسب مصلحته و شوية و هاتكون مصلحته مع الثورة و هانلاقيه رجع تاني يشكر فيها ياريت بقى ساعتها الثورة تدي له بالجزمة و ماتسألش فيه

ماحدش تفاجأ بالنتيجة زي ما هو مصورين للعالم .. كلنا كنا عارفين ان ده هايحصل و اتمنى ان في المرحلة التانية ناخذ عينة عشوائية كده من الناخبين و نسألهم كام واحد فيهم جاي ينتخب على اساس البرنامج الانتخابي و نسأله ايه النقاط اللي عجبته فيه و بالتالي جاي ينتخب بقلب جامد و كام واحد بينتخب لان الحزب الفلاني او المرشح العلاني وزع عليه مواد تموينية و بطاطين

اللي خانوا العهد عشان مصلحتهم معروفين جدا و ماحدش هايثق فيهم تاني و ادينا قاعدين و بنتفرج على برلمان متسلقي الثورة و اكثر من انتفع منها بعد ما كفرها و انكرها و اهان ثوارها و اما نجحت قال بس هي دي الطريق للبرلمان و كان له ما اراد

المطالب معروفة من البرلمان انما طبعا هم معروف عنهم اللف و الدوران و مش هايعملوا غير اللي فيه مصلحة لهم و بس و عمالين يتكلموا عن الاقتصاد – البنوك – السياحة ...الخ

محاكمات للقتلة و حق الشهداء و كنيسة القديسين و احداث ماسبيرو و موقعة الجمل و الاعلام المحرض و رد الاموال المسروقة و الاجور و القضاء على المحسوبية ...الخ

و للحديث بقية .....