أول حج

النهارده و كل يوم عرفة بفتكر اول مرة حجيت فيها اعتقد ان اول حجة هي اللي بتكون اقوى و اعمق حتى لو حجينا بعدها عشر مرات 

كان مشهد مهيب فعلا و خيام كتيرة و ناس اكتر طبعا  كنا حوالي 2 مليون حاج وقتها 

كنت سعيدة اوي بالرقم ده و بقول في نفسي ياااااه بقى احنا 2 مليون حاج واقفين عند جبل عرفات في اللحظة دي و كلنا بنصلي و بندعي

كان في شهر فبراير و الجو ماكنش حر خالص حسيت ان دي نعمة من نعم ربنا عليا في اول حج ليا 

يوم عرفة دعيت ثلاثة ادعية من كل قلبي حقيقي و الثلاثة الحمدلله ربنا سبحانه و تعالى استجاب لهم 

كنت ببكي اوي يومها لدرجة ان الناس اللي كانوا معايا في الخيمة قعدوا يدوني معلب مناديل 

صلاة العيد كانت في الحرم المكي ال 2 ميلون حاج بالاضافة لكل اللي جم يصلوا العيد بقينا يومها 2 مليون و نصف ادوا صلاة العيد

يوم رمي الجمرات كان في حجاج بيرموا بكل عافية فيهم و جت زلطة صغيرة في راسي من حاج اسيوي يبدو انه كان غاضب جدا من الشيطان

البيات في منى و الناس الطيبة اللي كانوا بيوزعوا اكل و شرب على كل اللي يقابلوهم 

يوم عرفة بقى مع المشهد المهيب ده كان كل حاج بيدعي ربنا و كل بينطق بلسانه و بلغته 

ماكنتش بفهم هم بيقولوا ايه لكن و ايه لزمتي انا ربنا سبحانه و تعالى عارف و فاهم دعواتهم كانت ايه

بس كانوا بيدعوا من قلبهم اوي و ببكاء و دموع و خشوع رائع 

كل سنة بيجي اكتر من 2 مليون حاج من كل بلد و كل جنسية و كل لسان 

السنة دي كانوا 4 مليون و شوية 

و حصل تسهيلات كتيرة لاداء المناسك تيسيرا على الحجاج 

كان في عواميد كده بترش مياة باردة على الحجاج عشان الجو الحر و الزحمة 

و مقطورات ضخمة اوي بتوزع وجبات على الحجاج هدية من الملك 

وقت ما كنت هناك البعض اشاع ان بعض علب الوجبات فيها جزء صغير من كسوة الكعبة 

اللي كان قاعد و مش عايز يروح ياخد وجبة جري على الطوابير اللي واقفة عشان ياخد وجبته و يمكن يلاقي جزء من الكسوة 

عن نفسي في كل مرة حجيت مالقتيش في علبة الوجبة جزء من الكسوة و ما صادفتش حد لاقى 

دي كانت افضل رحلة في حياتي ... اول حج ليا