النخبة ... عا ابوكو كولكو

ممكن الموضوع مايكنش وقته بس انا شايفه اننا المرة دي بنستجدي الناس انها تدعمنا و تنزل معانا في ميادين و شوارع مصر عكس الـ 18 يوم .. في الاول نزلنا لوحدنا و بعدين الناس من نفسها تضامنوا معانا و ملينا ميادين و شوارع مصر لمدة 18 يوم

شوفوا كام جمعة و كام مليوينة دعينا لها و كام شخص حضر فيها بعد التكليف الاسود مقارنة  بالـ 18 يوم

الملاحظ ان للاسف الشديد بعض النخبة او المشاهير على الشبكات الاجتماعية بيتاجهلوا الرد على اي شخص حتى لو كان بيقولهم صباح الخير طالما الشخص ده مش من ضمن الدائرة المغلقة بتاعتهم

بعضهم كمان اذا حد سألوا عن موقف معين نقول مثلا سؤال ... هي الناس مامشيتش من التحرير ليه اما مبارك قال انه مش هايترشح تاني

بعض النخبة بقوا يردوا على سؤال زي ده بشكل عام ... يعني الشخص يسأل عضو النخبة مباشرة مثلا يجي النخبة ده يرد عليه في رسالة عامة ... يعني حتى ما كلفش نفسه يخاطب اللي سأله

و يرد بقى و يقول ... اللي مش عارف ليه احنا واقفين لغاية دلوقتي في التحرير يروح يكمل نوم احسن و برضه مايجاوبش هم ليه لسه في التحرير

مش دايما يكون اللي بيسأل سؤال استفساري زي ده بيكون بيستعبط زي ما جناب بعض النخبة معتقدين بالعكس في ناس بتكون عايزه تعرف الحقيقة بجد ... بيكونوا شايفين كلام في الاعلام التحريضي و شايفين عكسه مع المتظاهرين

و لانهم طيبين جدا و قلوبهم صافية ( زي ملايين من المصريين اللي اصلا صفتهم المعروفة للعالم كله الطيبة و القلب الصافي( فمش قادرين يحددوا الطرف اللي على حق بيسألوا لعل و عسى يوصلوا للحقيقة ... لكن طبعا بعض النخبة بيتعالوا على الناس و بيرفضوا يوضحوا اي استفسار للاسف

و بعدين يجوا يعيطوا بقى و يسألوا هي الناس مش واقفة معانا ليه ... ماهو عشان حضراتكم شتمتوهم و اتريقتم عليهم بقى لكم كام شهر ... بتدوروا عليهم دلوقتي ليه بقى و طالبين دعمهم

ده اللي بيحصل اودامي على الشبكات الاجتماعية من بعض النخبة فما بال بقى في الشارع ... اما واحد يجي يسأل شخص من اللي وجوههم معروفة .. كابتن لو سمحت هو انتم واقفين في شارع محمد محمود ليه 

هو مش بيسأل استعباط و لا تضييع وقت ... هو بيسأل لانه زيه زي ملايين غيره شايفين اننا واقفين في شارع محمد محمود و بنحدف طوب على الامن و هم بيحدفوا علينا قنابل و غازات و رصاص .. اللي بيسأل ده فعلا مش فاهم الضرب بين الطرفين في الشارع ده سببه ايه

اما يجي الكابتن يرد عليه و يقوله لو انت مش عارف روح كمل نوم و لا اتعالج و لا ارحمني ... هو كده ماوضحش حاجه ... بالعكس هو اهانه و شتمه ... طبيعي اللي بيستفسر هايقول عا ابوكو كولكو ... عيال قليلة الادب فعلا زي ما التلفزيون بيقول عليكم

و هايمشي و هايحكي اللي حصل لغيره و تنتشر الحكاية من شخص لملايين المصريين و الناس تفتكر ان كل اللي في التحرير كده مع ان اللي اتصرف كده هو فرد من نخبة مش النخبة كلها و لا الثوار كلهم

لو محتاجين الناس الطيبة الغلابة اللي ماعندهاش فضائيات و لا فيس بوك و لا تويتر و لا مدونات و مالهاش في الخبرة السياسية النضالية الكبيرة اللي انتم بتتمتعوا بيها و بتتعالوا بيها عليهم ... الناس دي عددها كبير اوي مش تملى ميدان التحرير بس ... لا دول لو كسبتوهم ... مش المجلس العسكري بس اللي هايمشي ... لا ده كل القوى السياسية الخاينة و الاحزاب الورقية و العالم كله مش هايقدروا يقولوا بم في وشكم يبقى لازم نرجع لاخلاق التحرير ... الحب و التسامح و التواضع الخ ... الاخلاق اللي خلت الملايين تدعم و تساند الثورة بجد

افتكروا اول 18 يوم ... التحرير و الشوارع في مصر كلها ماكنتش بتفضى ابدا لا صبح و لا ليل ... و بصوا حواليكم دلوقتي